Bıylǵy forýmda tuńǵysh márte «Qazaq tilindegi kommýnıkasııalar: jańa ustanym» taqyrybynda aýqymdy paneldik pikirtalas ótti. Qazaq tilinde oılaıtyn orta elimizde keńinen damyp keledi. Al biz ol jaıly ne bilemiz? Kommýnıkasııa jónindegi mamandarǵa qazaq tilinde oılaıtyn aýdıtorııamen ózara árekettesýdiń qyr-syry jaıly oılanatyn kez kelgen joq pa?
Bıylǵy Forým halyqaralyq PR naryǵyndaǵy sońǵy álemdik trendterge jáne onyń aldynda turǵan qıyn asýlarǵa, sondaı-aq, eldiń jáne bıznestiń ımıdji men bedelin basqarý, halyqaralyq brendterdi jahandandyrý jáne jergiliktendirý máselelerine, jergilikti aımaqtyń erekshelikterin eskere otyryp ilgeriletýge arnalǵan tıimdi quraldarǵa arnalyp otyr.
«Búgingi kúni kommýnıkasııalar naryǵy qarqyndy damyp qana qoımaı, sonymen birge, pıarshylardyń kásibı daǵdylaryna qoıylatyn talaptyń da kúsheıýde. Osydan bir jyl buryn jańa ári biregeı bolyp eseptelgen dúnıeler qazir eskirip úlgerdi. PR mamandarynan elde oryn alyp jatqan saıası jáne ekonomıkalyq jaǵdaılarǵa qatysty shapshań túrde áreket etý, jurtshylyqpen jumys júrgizýge arnalǵan eń ozyq quraldardy bilý talap etiledi. Dál sondyqtan da bıylǵy forým kóbinese taqyryptardy tereńinen zerttep, ótkizilý formatyn ózgertip, burynǵydan da kóp spıkerler men qatysýshylardyń basyn qosyp otyr», deıdi «PR-shy» klýbynyń prezıdenti Shynar Jánibekova.
Qalyptasqan dástúrge sáıkes Forým sáýir aıynda XVI «Sırenevyı PRoryv» stýdentter halyqaralyq konferensııasynan jáne stýdentterdiń PR jobalary baıqaýynan bastaý alǵan Qazaqstandaǵy PR kúnderin jalǵastyryp otyr. Almaty, Astana, Qaraǵandy, Qostanaı, Tarazdyń joǵarǵy oqý oryndarynan 150-ge tarta stýdent qatysqan bul konferensııaǵa 39 jumys kelip túsip, olardyń toǵyzy jeńiske jetti. Júldeli oryndarǵa ıe bolǵan stýdentter endi PR-forýmǵa qatysýda.
Forým shymyldyǵyn «Eń úzdik korporatıvtik basylym – 2018» ataǵy úshin jarııalanǵan Ortalyq Azııanyń 11-shi Korporatıvtik BAQ baıqaýynyń jeńimpazdaryn marapattaý saltanaty ashty. Bul baıqaý da PR kúnderi aıasynda ótkizilip, PR-forýmnyń ajyramas bóligine aınalyp úlgergen. Bıyl baıqaýǵa 18 kompanııadan 22 jumys kelip tústi. Qatysýshylar arasynda Qyrǵyzstan Respýblıkasynan da qatysýshy bar. Baıqaýǵa qatysqan korporatıvtik basylymdardyń barlyǵyn PR-forýmnyń birinshi kúni aıasynda uıymdastyrylǵan kórme kezinde tamashalaýǵa bolady.
Bıyl qatysýshylardyń nazaryna taǵy da «2017 jyldaǵy PR-oqıǵalardyń reıtıngi. Qaznette jáne odan tys eń qyzý talqylanǵan TOP-10 taqyryp» reıtıngi usynylady. Qazaqstan men basqa da elderdegi jurtshylyqty eleń etkizgen oqıǵalar mamandardan tizgindi ýystan shyǵaryp almaýdy talap etip otyr.
Sondaı-aq, forýmnyń birinshi kúni qatysýshylar, elimizdiń PR salasyndaǵy jetekshi mamandary, qoǵamdyq pikir kóshbasshylary, memlekettik jáne bıznes-qurylymdardyń top-menedjerleri, marketologtar men jýrnalıster CEO jáne bedeldi basqarý, táýekelderdi basqarý jáne memleketik organdarmen jumys júrgizý, áleýmettik sezimtal kommýnıkasııalar, Digital marketing syndy mańyzdy taqyryptardy ortaǵa salysýda.
Forýmnyń beıresmı formatta uıymdastyrylatyn ekinshi kúni búkil Qazaqstanǵa áıgili Medeý shatqalynyń sulý bókterinde ótip, qatysýshylarǵa aqparatty ıntekraktıvtik formatta alýǵa, brendterdi ilgeriletýmen aınalysatyn memlekettik jáne bıznes-qurylymdarǵa arnap keńesterdi daıyndap shyǵarýǵa, sheshimderdi talqylap, izdeýge arnalǵan jańa quraldarǵa qol jetkizýge, óz áriptesterimen keńinen netvorkıng qurýǵa múmkindik beredi.
Aınash ESALI,
«Egemen Qazaqstan»
ALMATY
